अचूक माहिती झटपट वर …
राज्यातील अमरावती आणि नाशिक पदवीधरसह औरंगाबाद, नागपूर आणि कोकण शिक्षक मतदारसंघापैकी चार मतदारसंघाचे निकाल जाहीर झाले आहेत. यात नागपूर, औरंगाबादमध्ये महाविकास आघाडीला विजय मिळाला आहे. तर नाशिकमध्ये अपक्ष सत्यजीत तांबे यांनी बाजी मारली आहे. कोकणात मात्र भाजपने विजय खेचून आणला तर अमरावतीत महाविकास आघाडीचा उमेदवार आघाडीवर आहे. या पाचही निवडणुकीत महाविकास आघाडीचचं वर्चस्व राहिल्याने भाजप आणि शिंदे गटाला धक्का मानला जात आहे. त्यातच खुद्द उपमुख्यमंत्री देवेंद्र फडणवीस यांच्या होमपीचवरही भाजपला पराभव पत्करावा लागला आहे.
नाशिकात सत्य की जीत …
नाशिकमधील निवडणूक सर्वाधिक चुरशीची आणि लक्ष्यवेधी ठरली. या निवडणुकीत सत्यजीत तांबे विरुद्ध शुभांगी पाटील अशी लढत होती. पण सत्यजित तांबे यांनी हा विजय एकहाती खेचून आणला. या निवडणुकीत सत्यजित तांबे यांना 68 हजार 999 मते मिळाली. तर शुभांगी पाटील यांना 39 हजार 534 मते मिळाली. तांबे यांनी तब्बल 29 हजार 465 मताधिक्य मिळवून विजय मिळवला.
काळेचा चौथ्यांदा ‘विक्रम ‘
औरंगाबाद शिक्षक मतदारसंघात चौथ्यांदा निवडून येण्याचा ‘ विक्रम’ महाविकास आघाडीचे उमेदवार विक्रम काळे यांनी केला आहे. विक्रम काळे यांनी भाजपचे उमेदवार किरण पाटील यांचा पराभव केला. या निवडणुकीत विक्रम काळे यांना 23 हजार 577 मिळाली. तर किरण पाटील यांना 16 हजार 663 मते मिळाली. विक्रम काळे यांनी तब्बल 6,914 मताधिक्य घेऊन विजय मिळवला आहे.
नागपूरमध्ये गाणार यांचा पराभव …
नागपूरमध्ये भाजपला मोठा धक्का बसला आहे. उपमुख्यमंत्री देवेंद्र फडणवीस यांच्या होम पीचवरच भाजपला पराभव स्वीकारावा लागला आहे. या निवडणुकीत महाविकास आघाडीचे उमेदवार सुधाकर अडबाले यांना तब्बल 16 हजार 700 मते मिळाली. तर भाजप पुरस्कृत महाराष्ट्र राज्य शिक्षक परिषदेचे उमेदवार नागो गाणार यांना केवळ 8 हजार 211 हजार मते मिळाली. विशेष म्हणजे नागो गाणार हे दोन टर्म आमदार होते. तरीही त्यांचा पराभव झाला. आडबोले यांनी 8,489 मतांचं मताधिक्य घेऊन विजय मिळवला आहे.
अमरावतीत फेर मतमोजणी सुरू …
अमरावती पदवीधर मतदारसंघाचा निकाल अद्याप यायचा बाकी आहे. भाजपचे उमेदवार रणजित पाटील यांनी निवडणुकीत अवैध मते पडल्याने फेर मतमोजणीची मागणी केली होती. त्यामुळे फेर मतमोजणी सुरू झालेली आहे. म्हणून अमरावतीचा निकाल लांबला आहे.
मात्र, फेर मतमोजणीतही धीरज लिंगाडे आघाडीवर आहेत. लिंगाडे यांना 43 हजार 577 मते मिळाली आहेत. तर रणजित पाटील यांना केवळ 41 हजार 248 मते मिळाली आहेत. लिंगाडे हे 2366 मते घेऊन आघाडीवर आहेत.
कोकणात भाजपचा विजय …
या पाचही मतदारसंघातील निवडणुकीचा सर्वात पहिला निकाल कोकण शिक्षक मतदारसंघाचा लागला. या निवडणुकीत भाजपचा विजय झाला, भाजपच्या ज्ञानेश्वर म्हात्रे यांनी शेकापचे बाळाराम पाटील यांचा पराभव केला. बाळाराम पवार हे विद्यमान आमदार होते. या निवडणुकीत ज्ञानेश्वर म्हात्रे यांना 20,800 मते मिळाली. तर शेकापचे बाळाराम पाटील यांना 9500 मते मिळाली. ज्ञानेश्वर म्हात्रे यांनी 11,300 मताधिक्य घेत आपला विजय नोंदवला आहे.