माजलगाव, दि.२३: आज दि.२३ (मंगळवार) पासून महाराष्ट्रातील प्रत्येक गाव, वाडी- वस्त्यांवर मराठा समाजाचे आर्थिक व सामाजिक मागासलेपण तपासण्यासाठी मागासवर्गीय आयोगाकडून सर्वेक्षण सुरू करण्यात आले आहे. दि.२३ जानेवारी ते ३१ जानेवारी २०२४ या आठ दिवसाच्या काळात मराठा व खुल्या प्रवर्गातील कुटुंबाच्या घरोघरी जाऊन हे सर्वेक्षण करण्यात येणार आहे.
त्या अनुषंगाने आपल्या माजलगाव शहर व तालुक्यात ही हे सर्वेक्षण होत आहे. त्याकामी माजलगाव शहरात १२ परिवेक्षक, १३३ प्रगणक तर तालुक्यातील ९१ ग्रामपंचायत अंतर्गत १२१ महसुली गावात, वाडी, वस्तीवर २० पारिवेक्षक, ३१७ प्रगणक ह्यांच्या मार्फत हे सर्वेक्षण आजपासून आठ दिवसात करण्यात येणार आहे. तालुक्यातील जवळपास ६१ हजार ५३२ कुटुंबाचे सर्वेक्षण होणार आहे.
मराठा समाज बांधवांनी योग्य सर्वेक्षण करून घावे
मराठा समाजाचे व खुल्या प्रवर्गातील कुटुंबाचे सर्वेक्षण आज पासून गावागावात होत आहे. या कामी मराठा समाज व खुल्या प्रवर्गातील नागरिकांनी सर्वेक्षण करून घ्यावे व त्याकामी सहकार्य करावे, असे आवाहन तहसिलदार वर्षा मनाळे यांनी केले आहे.