माजलगाव,दि.३०: येथील माजलगाव बाजार समिती संचालक मंडळाच्या पहिल्यांदाच रंगितदार झालेल्या निवडणुकीसाठी रविवारी मतदान होऊन त्यात आमदार प्रकाश सोळंके यांनी १८ पैकी १२ जागा जिंकून आपला गड राखला. भाजपचे नितीन नाईकनवरे,मनोज जगताप,भगवान आगे विजयी झाले तर माजी आमदार राधाकृष्ण होके गटाचे व्यापारी मतदारसंघात प्रभाकर होके व जुगलकिशोर नावंदर विजयी झाले. तर हमाल मापाडी मतदार संघात अपक्षाने विजय मिळवला.
सकाळपासूनच मतदारांमध्ये मतदानासाठी उत्साह दिसून आला. दुपारी चार वाजेपर्यंत ९६.९३ टक्के मतदान शांततेत झाले.
माजलगाव बाजार समिती निवडणूक राष्ट्रवादी काँग्रेस व भाजपकडून ताकत लावुन प्रतिष्ठेची केली होती. रविवारी सकाळी ७ वाजल्यापासून जिल्हा परिषद प्राथमिक शाळेत सुरुवात झाली. मतदान केंद्रावर आमदार प्रकाश सोळंके, भाजप, शिवसेना (ठाकरे गट) असे सर्वपक्षीय नेते तंबूत तळ ठोकून होते. सोसायटी मतदारसंघात ११ जागांसाठी ६०९ पैकी ६०१ मतदारांनी हक्क बजावला, ग्रामपंचायत मतदार संघात ४ जागांसाठी ५५३ पैकी ५४९ मतदारांनी हक्क बजावला, व्यापारी मतदार संघात २ जागांसाठी ७८५ पैकी ७३३ मतदारांनी हक्क बजावला तर हमाल मापाडी मतदार संघात १ जागांसाठी २३३ पैकी २३० मतदारांनी हक्क बजावत एकूण २१८० मतदारांपैकी २११३ मतदारांनी मतदान केले. पंचायत समिती सभागृहात सहाय्यक निबंधक विकास जगदाळे यांच्या मार्गदर्शनाखाली मतमोजणी होऊन त्यात हमाल-मापाडी मधून कदिर शेरखान पठाण हे अपक्ष म्हणून ३० मतांनी विजयी झाले. व्यापारी मतदारसंघात माजी आ.राधाकृष्ण होके गटाचे प्रभाकर होके व जुगलकिशोर नावंदर हे विजयी झाले.सोसायटी मतदारसंघात आमदार प्रकाश सोळंके गटाचे संजय वाचिष्ट कचरे, अशोक गोविंदराव डक, दत्तात्रय जिजाबा डाके, जयदत्त सुभाषराव नरवडे, उध्दव विठ्ठलराव नाईकनवरे, विरेंद्र प्रकाशराव सोळंके, नंदकिशोर दत्तात्रय सजगणे महिला मतदार संघात अंजली आबाजी भोसले, सरस्वती आसाराम घायतिडक, इतर मागासवर्ग मधून अमोल अरूनराव जाधव, ग्रामपंचायत मतदार संघात भागवत शेजुळ, श्रीहरी मोरे हे विजयी झाले. तर व्यापारी मतदार संघातून माजी आ.राधाकृष्ण पाटील यांच्या गटाचे प्रभाकर होके, जुगलकिशोर नावंदर हे विजयी झाले. तर भाजपचे सोसायटी मतदार संघात मनोज बाळाभाऊ जगताप तर ग्रामपंचायतमध्ये नितीन नाईकनवरे, भगवान लक्ष्मण आगे यांनी विजय मिळवला. तर हमाल मापाडी मतदार संघात कदिर शेरखान पठाण यांनी बाजी मारली.
यात आ.प्रकाश सोळंके यांनी १२ जागांवर तर माजी आ. राधाकृष्ण पाटील गटाने २ जागा, भाजप ३ जागा तर अपक्ष १ असे संख्याबळ आहे.