माजलगाव शहर पोलीस ठाण्यात गुन्हा दाखल
माजलगाव, दि.२१: पतीने पत्नीला लग्नात काहीच दिले नाही म्हणून धारधार शस्त्राने वार केले. यात पत्नीचा मृत्यू झाला असून याप्रकरणी पती विरुद्ध माजलगाव शहर पोलीस ठाण्यात गुन्हा दाखल करण्यात आला आहे. आरोपी पतीला ताब्यात घेतले आहे.
तालुक्यातील भाटवडगाव येथील आरोपी पती अनंत भागवत सुगडे (वय ३८ वर्ष) याने पत्नी प्रतिभा अनंत सुगडे (वय २९ वर्ष) हिला तुझ्या घरच्यांनी लग्नात काहीच दिले नाही. म्हणून गेल्या अनेक दिवसापासून शारीरिक व मानसिक त्रास देत होता. त्यातच गुरुवारी दि.२० रोजी आरोपी पतीने पत्नीस मारहाण करून धारदार शस्त्राने शरीरावर वार केले. यात गंभीर जखमी अवस्थेत उपचारार्थ माजलगाव ग्रामीण ग्रामीण रुग्णालयात दाखल केले. प्रकृती चिंताजनक असल्याने अधिक उपचाराकरिता बीड येथील शासकीय रुग्णालयात पाठविले असता उपचार दरम्यान प्रतिभा हिचा मृत्यू झाला.
यामुळे मयत प्रतिभाचा भाऊ प्रथमेश प्रकाश पंडित रा.जामखेड जि.अहमदनगर यांच्या फिर्यादी वरून आरोपी अनंत भागवत सुगडे कलम ३०२,४९८ प्रमाणे खुनाचा गुन्हा माजलगाव शहर पोलीस ठाण्यात नोंद करण्यात आला आहे. अधिक तपास पोलीस उपनिरीक्षक दाभाडे हे करत आहेत.