वन विभागाच्या अधिकाऱ्यांच्या प्रथम दर्शनी निष्कर्ष
माजलगाव,दि.२९: माजलगाव व गेवराई तालुक्याच्या हद्दीच्या भागातील इरला मजरा व चिंचोली येथे शेतकऱ्यांना दिसलेला तो वाघ नसून बिबट्या असल्याचा प्रथम दर्शनी निष्कर्ष वन विभागाच्या अधिकाऱ्यांनी आज सकाळी १० वाजता भेट देऊन पाऊलाचे ठसे पाहून लावला आहे. तसेच त्या बाबत खात्रीसाठी वरिष्ठांना सदरील पाऊलाचे ठसे पाठवले आहेत. शेतकऱ्यांना सावधगीरी बाळगण्याचे आवाहन वन परिमंडळ अधिकारी दिनेश मोरे यांनी केले आहे.
माजलगाव तालुक्यातील इरला मजरा हे गाव तालुक्याचे शेवटचे गाव आहे. शेतकरी अशोकराव कोटुळे हे शेतात मंगळवार दि.२८ रोजी सायं.६ वाजण्याच्या दरम्यान बाजरीला पाणी देत होते. तर त्यांना अचानक पाच सहा फुटांवर वाघ दिसला. म्हणून त्यांनी पळत सुटत गावात येऊन गावकऱ्यांना हकीकत सांगीतली. यावर तहसीलदार यांना संपर्क साधून माहिती दिली. यावर वन विभागास तहसिल प्रशासनाने कळवले, त्यानुसार आज दि.२९ बुधवारी सकाळी १०.३० वाजता माजलगाव विभागाचे वन परिमंडळ अधिकारी दिनेश मोरे, गेवराई वन परिमंडळ अधिकारी सुनिल टाकणखार, तलाठी सुधाकर पराड यांनी सदरील ठिकाणी भेट देऊन पावलाच्या ठसे पाहणी केली. त्यात सदरील ठसे हे बिबट्याचे असल्याचे प्रथम दर्शनी निष्कर्ष वन अधिकाऱ्यांनी सांगितले.
सदरील बिबट्या हा इरला मजरा व चिंचोली शिवारात असल्याने त्या परिसरातील तालखेड, पुंगणी, एकदरा, तेलगाव खु., डब्बा मजरा, पूंगणी व गेवराई तालुक्यातील त्या लगत असलेल्या गावातील शेतकऱ्यांनी व नागरिकांनी सावधगिरी बाळगावी.
शेतकऱ्यांनी सावधगिरी बाळगावी
सदरील पाऊलाच्या ठस्यावरून वाघ नसून बिबट्या असल्याचे दिसून येते. शेतकऱ्यांनी सावधगिरी बाळगावी, शेतात जाताना एकट्याने न जाता सोबत घेऊन जावा. बिबट्या दिसल्यास त्याच्यावर हल्ला करू नये. कारण स्वतः हून बिबट्या हा भित्रा प्राणी असल्याने हल्ला करत नाही. स्वतःच्या गळ्याला रुमाल वापरा. रात्रीच्या वेळेस फटाके असतील तर वाजवा किंवा स्वतः जवळील मोबाईल वर गाणे वाजवीत ज्यामुळे बिबट्या जवळपास थांबानार नाही. तसेच वन विभागाशी संपर्क साधावा असे आवाहन शेतकऱ्यांना माजलगावचे वन परिमंडळ अधिकारी दिनेश मोरे यांनी केले आहे