माजलगाव, दि.७: येथील भाजप नेते अशोक शेजुळ यांच्यावर भरदिवसा सहा हल्लेखोरांनी शहरातील शाहू नगर येथे अडवून रॉडणे जबर मारहाण केल्याची घटना आज (मंगळवारी) सकाळी १०.३० वाजण्याच्या दरम्यान घडली. यात शेजुळ यांचे दोन्ही पाय व दोन्ही हात फ्रॅक्चर तर डोक्याला ही मार लागला असून त्यांची प्रकृती गंभीर असल्याने छत्रपती संभाजीनगर येथे उपचारार्थ पाठवले आहे. दरम्यान हा हल्ला आमदार प्रकाश सोळंके समर्थकानी केला असल्याचा आरोप जखमी शेजुळ यांच्याकडून करण्यात आला आहे.
अशोक शेजुळ हे दररोज प्रमाणे आज दि.७ मंगळवारी सकाळी १०.३० वाजता शहरातील डॉ.बाबासाहेब आंबेडकर चौक येथे पान खाण्यासाठी आले होते. त्या ठिकाणाहून घरी परत जात असताना शाहू नगर येथील मोरेश्वर विद्यालय जवळ पाठलाग करत असलेल्या सहा हल्लेखोरांनी अडवले. त्या ठिकाणी अचानक त्यांनी रॉडने अशोक शेजुळ यांच्यावर वार करू लागले, यावेळी तेथे असलेल्या नागरिकांनी धाव घेतली असता त्यांनी त्या ठिकाणाहून पोबारा केला. यावेळी शहरातील खाजगी रुग्णालयात प्राथमिक रुग्णालयात उपचार करून छत्रपती संभाजीनगर येथे उपचारार्थ दाखल केले आहे. यात शेजुळ हे अत्यंत गंभीर जखमी असून त्यांचे डाव्या पायाला तीन फ्रॅक्चर, उजव्या पायाला एक फ्रॅक्चर तर दोन्ही हात ही फ्रॅक्चर असून डोक्याला ही जबर मार आहे.
हल्या बाबत विचारले असता अशोक शेजुळ यांनी हा हल्ला आमदार प्रकाश सोळंके यांनी केल्याचा आरोप केला आहे. हल्लेखोर हे मला आमदार प्रकाश सोळंकेच्या तक्रारी करतो का ? असे धमकावून रॉडने मारहाण करु लागले, असे सांगीतले.
संशय का जातो आमदार सोळंके यांच्याकडे ?
येथील भाजपचे नेते अशोक शेजुळ यांनी आमदार प्रकाश सोळंके यांनी माजलगाव मतदार संघातील विविध संस्थांमधून १६ कोटी रुपयांचा अपहार केल्याचे आरोप दि.१५ फेब्रुवारी २०२३ रोजी विविध वर्तमान पत्रातून केले होते. तसेच याप्रकरणी हायकोर्टात धाव घेण्याचा इशारा दिला होता. त्यानुसार दि.३ मार्च रोजी याचिका ही हायकोर्टात दाखल केलेली आहे.